大家可能煲劇就煲得多喇，但煲劇英文係咩你又知唔知呢？
煲劇英文係「binge-watch」；原來煲劇文化全球通行，「binge-watch」係 2015 年被 Collins Dictionary 選為年度風雲單字！「Binge-watch」係形容以馬拉松式，一口氣睇晒成套電視連續劇或節目嘅行為。
其實，電視劇集亦可以好似電影咁有唔同genre(類型)之分。以下落嚟就為大家介紹吓唔同類型嘅電視劇啦！
1. 情景劇 Sitcom
處境/情景劇，顧名思義就係講述一啲雖然誇大 (exaggerated) 咗同戲劇化 (dramatic)，但大致上生活化嘅日常「處境」。劇情主要圍繞一班固定嘅主演陣容，而通常每一集都有主題；集與集之間嘅連貫性比其他連續劇低。
有喜劇成分嘅情景劇亦可叫 situation comedy。
係香港，八點鐘播放嘅半小時劇集就係 sitcom 喇！
2. 肥皂劇 Soap Opera
咁 sitcom 同 soap opera 有咩唔同呢？
其實兩者係近似但唔一樣，sitcom 正如上述介紹，係注重於處境而且大多有主題；soap opera 雖然都係有固定嘅主演陣容同誇張嘅劇情，但更側重於情感關係 (emotional relationship)。而正正因為 soap opera 係「情感大過天」，所以劇情有陣時都會唔合理或誇張。
3. 喜劇 Comedy
Comedy 即以搞笑為主嘅劇集。
係香港，電視台為咗迎合新年嘅喜慶氣氛同埋暑假學生放暑假嘅時節，通常會係呢啲時候播出 comedy。
4. 科幻/奇幻 Science Fiction/ Fantasy
Science Fiction/ Fantasy 泛指一啲係現實生活唔會發生嘅情節，比較天馬行空。其中，有唔少劇集係改編自神話 (myth) 同民間傳說 (folk)～ 呢類型嘅劇集通常都會運用好多特效。
5. 犯罪劇情/警匪/偵探 Crime/ gangster/ detective
呢一類「兵捉賊」嘅劇集通常都係以單元模式播出，劇情比較緊湊，主角大約兩至三集就會「破案」。而大結局嘅案件通常都係全劇最複雜嘅，亦係劇集嘅高潮。
呢類劇集係香港同日本都幾受歡迎㗎！
6. 古裝 Historical/ period
係某程度上，古裝片可以話係亞洲獨有。點解呢？
因為外國嘅「古裝片」更常被稱為時代劇或 costume drama，而且所涉及嘅時代亦通常都唔太久遠，例如係英國嘅18世紀末。再加上外國嘅「古裝片」如果係牽涉比較久遠嘅時代，十居其九都加入虛構同奇幻嘅元素，所以將呢一類劇集歸類為上述嘅 fantasy 會更加合適。
至於亞洲嘅古裝片題材就相對上更豐富，可以細分為：
歷史劇 Historical – 將真實歷史影像化，從而令觀眾認識歷史
武俠劇 Wuxia/ Kung Fu – 劇情大多冇歷史根據，有好多打鬥場面，著名嘅例子有改編自金庸小說嘅劇集
宮廷劇 Palace/ Royal – 劇情圍繞皇宮內後宮及前朝嘅明爭暗鬥
故事/穿越劇 Time Travel – 劇情絕大部分屬於虛構，主角通常都由現代穿越時空到古代
學經典廣告話齋：電視節目有好多種～
所以其實有時候都好難以 genre (類型) 明確咁區分劇集，尤其是近年電視劇嘅題材越嚟越創新。
大家平時又鍾意煲咩類型嘅呢？
